اعتذر محمد الشناوي حارس مرمى الفريق الأول لكرة القدم بالنادي الأهلي لجماهير القلعة الحمراء، اليوم الأحد، وذلك بعد السقوط أمام باتشوكا المكسيكي بركلات الترجيح في كأس القارات للأندية.

وقال محمد الشناوي عبر "الكورة مع فايق": "أنا بعتذر بالنيابة عن نفسي وعن زمايلي لكل جمهور الأهلي.. وأنا متخانقتش مع بعض من الجماهير ومستحيل ده يحصل مني والجماهير على راسي ومقدرين زعل الجمهور وكنا في صدمة امبارح والفيديو مقتطع.. الناس افتكرت إني بقول همشي من النادي أنا قولت همشي جوه الأوضة".

وأضاف محمد الشناوي: "مينفعش أهدد جمهور الأهلي.. واحد من الجماهير اتلفظ بلفظ خارج مقدرش أقوله وقولتله أنا همشي لأوضة اللبس وعمري ما هجيب سيرة الجمهور.. أنا لما خدت أحسن لاعب في أفريقيا ما احتفلتش عشان خاطر الجمهور بعد خسارة بطولة.. هل أنا بعد كل ده أشتم الجمهور بتاعي ولا أهاجمهم".

وواصل محمد الشناوي: "أنا موجود في الأهلي لغاية آخر يوم في عمري.. أنا ابن النادي وهفضل موجود إلا لو مشيت من خلال إدارة النادي".

وأكمل: "احنا عندنا أهداف كتير ومش عايزين حاجات تعطلنا.. البطولة كانت قريبة منا وضربات الجزاء ملهاش كبير وأنا لسه مصدوم.. ربنا مكنش عايز ومكنش في توفيق واللاعيبة عملت اللي عليها طوال الـ 120 دقيقة.. احنا بنلعب دائما عشان خاطر الجمهور وبعتذر للجمهور رغم إني معملتش حاجة".

وأردف: "احنا في الأهلي في نظام والمدير الفني هو من وضع ترتيب مسددي ركلات الترجيح أمام باتشوكا، لدينا نظام في النادي الأهلي بيمشي علي الكبير والصغير سواء الشناوي أو إمام عاشور".

وأتم قائد فريق الأهلي: "هدفنا أننا نصل لأبعد مدي في بطولة كأس العالم للأندية 2025.. تركيزنا الحالي في دوري أبطال أفريقيا والدوري المصري".